سجون العتمه
و بارميكي يا آهة جرح
على جدار الزمن الأخرس
ترُديلي ..
تعدي عقارب الساعه
تشيلي العمر ف جبيني
تعديلي ..
ثواني عمرنا المجنون
بتتأخر ..
قصور الوقت تتبخر
مهيش عايزه زمن أكتر
و لا بتحلمش
برعشة رمش
بيسافر بلاد النور
|
ــــــــــــــــــــــــــــــــــــــــــــــــــــــــــــــــــــــــــــــــ
بيتحرر .. من الألوان
و م التصاوير
بابيعك يا آيات الوحده
و بارفض أجعلك وِردِي
كفايه التلج و الضلمه
و سجني فى متاهة ليل
كتاب الانكسار حفظاه
دبول الورده ف خدودي
ده شئ عادي
و ليه ألعب معاك حَذَّر
و اخبي بايدي رمش عنيك
مدام عمرك شتا على طول
سجون العتمه شط كبير
|
ــــــــــــــــــــــــــــــــــــــــــــــــــــــــــــــــــــــــــــــــ
ملان خفافيش
ما بعشقهوش .. لكن زرته
بآهه خارجه بالراحه
و رافضه الهدنه والتسليم
و رافضه الكلمه تِتصَلِّب
أو تتغني ف بلاد صُم
و رافضه شكل حريه
محزمينها بالتفكير
مزوقينها بفيونكه
و رمينها ف قفص
عصافير
السويس 1998
ليست هناك تعليقات:
إرسال تعليق