لساني جوا عيونك هم
و إنت ف عمري كنت أهم
لساني حباية الضي الفاضله
ف عينك
و إنت بتسحب آخر شيء
ف رصيدك
و بتوصيني على روحي
و انا با فرد عمري
شريطه ستان
ف طرف البرواز
الحاضن صورتك
و باخلَّص روحي
من آخر باصَّه عليك
|
ــــــــــــــــــــــــــــــــــــــــــــــــــــــــــــــــــــــــــــــــ
و اسقَّط دمعه
فى غابة رموشك
باسقيك الحلم
اللي معشتوش
و باقفل أبواب التمنِّي
صوت الرصيف اتحشرج
شارع عمرك انتهي
كل الخطاوي مروَّحه
والعابرين جنبك هوا ..
و أنا
وحدي باحسَّك
خطوتين باقيين فى ضلَّك
ليه بتجري .. ليه تعزِّيني
|
ــــــــــــــــــــــــــــــــــــــــــــــــــــــــــــــــــــــــــــــــ
فى عمري
بتحسسني بعجز ارادتي
و انا فاقده حتي الاعتراض
إنت .. كنت افتراض
لحبة حياه
خلصوا بدري
دوبوا عمرك فى عمري
إنت .. قررت الغياب
و أنا .. مكتوب اعيش
أفتِّش فى دولاب البُكا
و انشر ف أحزان السنين
انشف الدمع بآهاتي
و انسِّي روحي بالحنين
|
ــــــــــــــــــــــــــــــــــــــــــــــــــــــــــــــــــــــــــــــــ
و لما اتعب .. أترمي
على شماعه تايكه
و اتركن على اقرب ناصيه
في طريق الحياه
السويس سبتمبر 2004
ليست هناك تعليقات:
إرسال تعليق