بتفكريني بالزمن الداير
و الأيام العايمه
في بحر التواريخ
فانوس بينور حَبَّه
و بيسكت ساعة الريح
و ورده بتحضن قلب كتاب
و قصيده بترقص فوق شفايفي
لما بتتحني بلمسة حبر
كوباية الشاي الوالعه
و الفكره الصافيه
ف عقل تعبان من الفكر
و لما بتتكلمي .. بنكفي ع العمر
و اقرا فيه كل سطر
|
ــــــــــــــــــــــــــــــــــــــــــــــــــــــــــــــــــــــــــــــــ
يحكي عن حلم اتشبك
في نظره لبكره
الطريق الواحد ..
إشارات
المرور
مريلة المدرسه
كوبري الحياه
اللي ما يصدق نعدي عليه
يحضن خطانا
درس كيميا محضرتهوش
كنتي نصي العلمي خالص
وبمنسهوش ..
بتفكريني بالحاجات والزمن
و فارس الأحلام
و الحلم اللي ما اكتملش
|
ــــــــــــــــــــــــــــــــــــــــــــــــــــــــــــــــــــــــــــــــ
و قطر الدنيا الطاقق
و فلنكات السكه الواقعه
و رومانسيه ما بتتحققش
كنتي العقل .. و أنا
كنت الطيره العايمه
في بحر الروح
بس نسيتك حبه
و اما كتبت حروف من إسمي
لقيتك بتغَمِّي عنين الصفحه
فعرفت إننا واحد
و انك سابحه .. فى شلال دمي
ليست هناك تعليقات:
إرسال تعليق