حامي رصيف البدن
شارخ ف جدور العمر
غارزه إديَّه
في شِرب الآهه و الحيره
بين نون العذارى
و حلم البنات اللولي
مسنوده على كتف الليالي
بادعي من جوف الفَلا
يخبط على بابي
خادم المصباح
يا تاج مدندش
بضحك النجوم
و سهراية قمر
|
ــــــــــــــــــــــــــــــــــــــــــــــــــــــــــــــــــــــــــــــــ
عاشق يلألأ ف السواد
بتشوفني ليه .. و تستخبى ؟
هو انت حالف
لتجافيني ؟
اكمني كابشه تراب
السكة بيميني
و مولعه الكانون
يسوي آهات عمري
ما تحاول مره .. ترمي
المنديل أبو قويه دايبه
و خرز تايك
و جلابيتي الدبلان
اللي عاشقه
|
ــــــــــــــــــــــــــــــــــــــــــــــــــــــــــــــــــــــــــــــــ
ريحة النوم على سطح
فرن اتكوى
من حضن ايامنا
فيها ايه لو تدخل
بيتنا المعتق بالشقا
و تحطني
فوق سطح دارنا القش
و انا لابسه زَي
أميرات السعاده
و بادوس بكعبي ع السنين
فتفز
تعمل عجايز .. تنحني
من ضي عيني
|
ــــــــــــــــــــــــــــــــــــــــــــــــــــــــــــــــــــــــــــــــ
اللي واصل لسقف الروح
ياه .. لما اطبطب
على ضهرك يا الفانوس
ينطرد غضب السنين
اللي .. كان محبوس
و تزغرت الأيام
مع ضحكة الحظ
اللي كان خايف
يدق باب
بيتنا الحديد
السويس 3/3/2006
ليست هناك تعليقات:
إرسال تعليق