سندريلا
باظهر و اختفي
بَنَوَّر و انطفي
و افتَّح قطن و بنفسج
و باقفل شيش و كتاب
و سيره فجأه اتفتحت
باظهر .. في لحظه
و اعدي على ضَهر العمر
و اسلم بإيدي على ذكرياتك
يوم .. يوم
و اختفي وقتن تبطل
الاندهاش
البصه دي .. مبحبهاش
إنك تحاول تفتكرني
|
ــــــــــــــــــــــــــــــــــــــــــــــــــــــــــــــــــــــــــــــــ
بلاش
بنور .. يمد تحتي
ألف جسر عبور
و تجيني أحلام النسا
عاملين عنيهم سور
و انا وسط منهم
حبة اسئلة
محتاجين تفكير
و اطَّفى شمعيتك
بنفسي اللي محروق
انتظار
غبت عليه
و انا لسه مبتطلتش
|
ــــــــــــــــــــــــــــــــــــــــــــــــــــــــــــــــــــــــــــــــ
اسقي زهور التمني
يمكن في يوم
القاك بتدَّور
على حته من عمرك
نسيتها عندي
بافتَّح .. ضحكه
ف شريان الندم
و ازهَّر بنفسج
بيحيا رغم الألم
و باقفل أي رغبه
ف الهروب منك
و باخرج من شقوق
روحي
|
ــــــــــــــــــــــــــــــــــــــــــــــــــــــــــــــــــــــــــــــــ
و اسيبلك ليله
من عمري
تجيبك
بعدي تستنى
خيال يجي مقاس
ضلك
و باتمنى
..
يكون فيَّه اللي
فاضلك
السويس الخميس 29/12/2005
ليست هناك تعليقات:
إرسال تعليق