فتي أسمـر وعـود خرزان
و لفة حُب ف يمـيـنه
و كيس مليان بلح أَمهات
و بسمة وش سنترفيـش
ترش العزه ع السامعين
فتي أسمر ... زنده الشعـر
و متعافي بحُب الناس
و مدَّفي بصُحبة عِشرَه
من أخلص حروف القول
و صوت أقوي من الخفافيش
و خيل ف القلب بترذَّع
عشان تخرُج
حدود الصمت كالمتاريس
|
ــــــــــــــــــــــــــــــــــــــــــــــــــــــــــــــــــــــــــــــــ
و آه من عِزه لما تصير
من المحابيس
و حافر ألف ألف حُصان
يدق برجلُّه ع الفاضي
ما دام الحُر بيموت قهر
و صاحب ملهي عصر الذُل
بقي قاضي
حضنت يا فاوي جوف الليل
بتستني وطن
مهوش عادي
و مش راضي
بغير العِـزَّه و القومه
و صرخة كبرياء العـمـر
|
ــــــــــــــــــــــــــــــــــــــــــــــــــــــــــــــــــــــــــــــــ
جوه الحلق مهزومه
ناديت سمع النِدا عمـري
جريت أفتح كتاب المعجزات
لقيت ورق السنين بايش
و دمعه تشق خَدْ القلب
مفيش تاني نِدا ع الخـيل
و لا دعـوه
بصوت عاشق لنبض تـراب
حبيبة العُمر تمشي عليه
يا فاوي .. إيه ؟
خلاص خَّلصت
سيبت الحَلَبه للراضعين
لبن فاسد
|
ــــــــــــــــــــــــــــــــــــــــــــــــــــــــــــــــــــــــــــــــ
و نايم جوه ضمايرهم
شيطان كابش على الهمه
و سيبت لمين
حدود محتاجه
حرس صاحين
و بعدك نبوت الغفير مركون
على جدار السنين ساكت
و مقسوم ضهر الكلام
بَعدك ..
يا فاوي .. دمعتي حارقه
جفون العمر .. على بُعدك
عرفناك ليه ؟
و ليه حبت قلوبنا عنيك
|
ــــــــــــــــــــــــــــــــــــــــــــــــــــــــــــــــــــــــــــــــ
سمارة وجهك الناري
و حُرقة قلبك المكلوم
على وطن اتحرم من الحُب
و م التصريح
و كنت الفالح .. و كنت فصيح
بتقدر ترضي نيـِّتـنا
و بتصالح ف قهر
غبــاوة التلميح
تقول انت و احنا علينا
نقول تاني
و ادينا بـنـبكـــي عليك
تاني ...
السويس الثلاثاء 15/11/2005
ليست هناك تعليقات:
إرسال تعليق