" و تلك الأيام نداولها "
و اللي رماك بالظن
مسيره يجرح جبينه
صوت النِدا متعلق
فى حرف الكون
و متمدد على سنينه
وقت اما دورك يحين
و تبقي شئ مقدور
راح تقرا صفحه بصفحه
ايه كان هناك بيدور
و أد ايه عمرك
كان عقل مُغمي عليه
وقع فى لحظه ومات
|
ــــــــــــــــــــــــــــــــــــــــــــــــــــــــــــــــــــــــــــــــ
فضيِّت من نورها عِنيه
خبطَّت فى الماشين
جنبك على الصراط
و ضحكت من ضعفهم
و كبرت جوا الذات
" ولكم فى القصاص حياة "
سيفك شطر الأمان نصين
نص اترمي متجرَّح
والتاني مستغرب
مين علمك أصول النشان
و انت اللي يا دوب
طوبه ..
واقعه من حافر حصان
|
ــــــــــــــــــــــــــــــــــــــــــــــــــــــــــــــــــــــــــــــــ
إيه اللي فجأه جرأك
خلاك تقطَّع فى حبال الهوا
و تدغدغ السكه الحديد
لجل ما يصبح لقانا مستحيل
وشك بينزف .. زيف
ألوان كلامك بتسيح
وسط سخونة قلبي
ما انتاش ..
قد الكرسي العالي
المادد ..
لقُرص الشمس
ليست هناك تعليقات:
إرسال تعليق