المولد
الزينات طايله شواشي البنا
والرغبه فى الوصل
طايله سابع سما
الله .. حي
يا حي حبك ع القلوب طاغي
يا ساكن المنتهي
و انا أيش أوصلني
يعني أما ألم المدد
في حجري .. وفي روحي
و انسى الوشوش
الدايخه فى الزحمه
هتضمني أبواب هداك
يا منتهي .. الأمنيه
ــــــــــــــــــــــــــــــــــــــــــــــــــــــــــــــــــــــــــــــــ
مدااااااااااد ..
العروسه دايبه موت ف الحصان
كورنيش الورق الملفوف ميت ف الألوان
و انا امي كانت تشيلني فوق
طرطوفة عودها
أدلدل رجليه المتعشمين بالجري
ترفعني فوق سحاب المدد
و خيمة الدخان
أشد الحلم اللي واقف ف عيني
و اشاور ع الحصان
يتعلق حنيني في طرف سيفه
و فجأة أخبط في حيل المدد
مداااااااااااد .. مدااااااااد
ركبيني يا امه ع الزقازيق
ــــــــــــــــــــــــــــــــــــــــــــــــــــــــــــــــــــــــــــــــ
خليني ابوس السحاب
و اشتكي لربنا
و انزل أغيظ الأرض
و ادبدب برجلي على ظلمها
كورنيش فستاني بيطلع
و بينسي بصة عين امي
تجري ضفايري تشد رقبتي
تخلعني من عمري
أقرص خدود امي تبُك الورد
ترمي الحروف الفاضله م الزهق
ع الأرض
( البنت عروس – والواد حصان )
يا سايبه شعري بيرمح
ــــــــــــــــــــــــــــــــــــــــــــــــــــــــــــــــــــــــــــــــ
و دراعي راح ينخلع
راح اكسر وسط العروسه
و اعرى ف دماغها
و امزع التل اللي حا بس وجعها
و بارمي عيوني .. فتحضن
ف شمخة عيون الحصان
و قلبه المعسل
و احسه بيخطف ضفايري ويجري
يا سنتين فُلج
الضحكه شخليله
صلي على سيدنا النبي
سمسميه يا حكاوي الهلالي
لافه وداني بشاله الحرير
ــــــــــــــــــــــــــــــــــــــــــــــــــــــــــــــــــــــــــــــــ
مربوطه بدراعه
و انا قلبي فرفر لما نمت
فوق سجادة علاء الدين
و بصيت على دمع المآذن
اللي بُكاهم غطي
على
قصص المداحين
و انكسر سيف
اللي راكب ع الحصان
نزلت دموعي ع العروسه
دابت ...
مفضلش غير ..
كورنيش ورق
الوانه دايبه
ــــــــــــــــــــــــــــــــــــــــــــــــــــــــــــــــــــــــــــــــ
ف
المداااااااااااااااد ..
مدااااااااااااااد ..
السويس من 11/7/2003
الى 14/5/2005
