متولِّفه الروح على نبض طميِّك
و حُضن غربلة العجين
و زعقة التوته ف نهارك
من رميها طول السنين
لجلن تجود بالعسل
يا أم حابي
على حُضن الشواشي سلام
و ضمت عافيت السكه
و طقت قريت الفاتحه
و لمت غيمت التنهيد
بنبوس اقدام الليل
لجلن يغير معاده
و نوصِّي سعت الفجر
|
ــــــــــــــــــــــــــــــــــــــــــــــــــــــــــــــــــــــــــــــــ
تنفرد حبَّه
لجلن يدور العَجَل
و يِحن قلب اليوم
و نشوف عيون الأمل
تنفض سنين النوم
تُرفض آيات الهدم
تطرح هَنا ليكي
و تعجن الحنه
تطول إديها الصبي
يسبق ف حيل بُكره
يِرمح حصان الزمن
يِطرح لفوق شجره
و ضحكه ف عيونِك
|
ــــــــــــــــــــــــــــــــــــــــــــــــــــــــــــــــــــــــــــــــ
و زرع للمطره
و بيت و ضِلَّايه
و حضن للشقيان
و توته و حكايه
و شاى ف عز البرد
ينشَدّ ضهر الشقا
يفرد ف عفيتنا
نترد ستر لعودِك
و حروف لكلمتنا
يا أم حابي
يا غازله لَمتنا
ليست هناك تعليقات:
إرسال تعليق