يا نجمه حاضنه السما
و سايبه اديكي لفوق
مين عَلِّمك فن اللألأة
مين ذوَقك بالضي
و وهبك الجناحات
علشان تطوفي بشوق
و لا تحبسك شرنقه
نورك ..مجرد همس
من فيض جبال النور
مرجيحه بتفرجك
ع الدنيا ... من غير سور
مين عَلِّمك والنبي
فن الغياب والظهور ؟
|
ــــــــــــــــــــــــــــــــــــــــــــــــــــــــــــــــــــــــــــــــ
مين سَكِّنك فوووق
علشان أبحلقلك
أملَي العيون بالحلم
و اتمني أكون جنبك
روحي هناك بتدوب
ف ساكني الملكوت
ف مِسك هابَّه روايحه
ساعة السَحَر فى سكون
بتلف كون قلبي
بتقُلُّه حِب .. دوب
عمرك يا نجمه سمعتي
عن مهرجان النور ؟
و رشرشات النفح
|
ــــــــــــــــــــــــــــــــــــــــــــــــــــــــــــــــــــــــــــــــ
فى ساحة القُدره
بتلِّف نَفسي كتير
و بتتسحِر و تموت
تِطلَع آهات قلبي
من سجن عبد تابوت
تفرد جناح مسحور
و تشيلها طاقة نور
تمشي ف مواكب مغفره
تِلبس حياة تانيه
ماهيش صحيح دنيا
لكن بيبان و قصور
و وشوش بياض فى بياض
كُحل العيون دايب
|
ــــــــــــــــــــــــــــــــــــــــــــــــــــــــــــــــــــــــــــــــ
ف نظرة وَصْل
.. و دمعة المُشتهي
لحبيبُه .. ساعة ظهور
يا نجمه .. ضُميني .. المسي خوفي
شيفاني من جوه ؟
رعشه ف بدن طافي
على موج سحاب السما
يتمني سرسوب رضا
و نظره تحضُني
و توهه وسط الأحبه
ترُدني مجبور
إنسان جديد خالص
من أولُّه مغسول
مشدود على جبينه
|
ــــــــــــــــــــــــــــــــــــــــــــــــــــــــــــــــــــــــــــــــ
خطين بخط القدر
أنزل لِوِش الأرض
أبدر فى روحي بذور
تطرح هَنا للكون
و صُبح لسه جنين
بِفَضُل كُن .. فأكون
أعشق .. أمووت م العشق
أطلُب وِصالك .. بُكا
أنزِل ف نقطة ندي
تترد فيا الروح
و أنا ببتدي البسمله
و ف إيدي حبة ضي
السويس الجمعة : 23/9/2005
ليست هناك تعليقات:
إرسال تعليق