بعد انتظارك ميت سنه
التوته لمِّت ضحكها
خبت هيامها فى حلمها
غنيوه كانت مشمشي
باحت بشي ودارت ف شي
وعد الشتا .. دايماً عيالي
بيتردد .. بيخاف م البرد
المدوي ف السكوت
الوعد .. موت
و انت انتظارك
الف موت
يا مشتهيني رمَّانه
يا معلَّق النجمه فى ليلي
|
ــــــــــــــــــــــــــــــــــــــــــــــــــــــــــــــــــــــــــــــــ
كون قمر..
ما تكُنْش حوت
يبلعني ساعِت دهشتي
وقت امَّا الملم فيَّا شئ
كنت افتكرته بينتهي
و يدووب خفوت
و انت ابتديت
قطف البنفسج
اللي كانت نظرته
رعشة مدي
فلقة صباحات
انتظار عمر الصدي
لمة شتاتك
|
ــــــــــــــــــــــــــــــــــــــــــــــــــــــــــــــــــــــــــــــــ
دلوقت غضبُه .. بيدبحك
ساعت تحاول ترمي طوبه
ع القمر
تفتكر انه ف يوم
هيريحك ؟!
السويس 2001
ليست هناك تعليقات:
إرسال تعليق