هافضل كده .. أستنا لما تدق
باب اللحظه تتكشف
أسرار الوقت
هافضل أطبطب
على قلبي يهدي
و يبطل عند
صعب .. اني ابوح .. اما باشوفك
باخنق صوتي .. و يفز من صوت ابويا
وشاله التقيل يكتم على كل الحروف
بصه غضب توقَف الكلمه ف لساني
و رافعة عصايته لفووووق
و نزلتها على دماغ الارض
ترعبني
|
ــــــــــــــــــــــــــــــــــــــــــــــــــــــــــــــــــــــــــــــــ
جوا جوفي خرفشة كلام
نفسي أدلوقهم حرفين حرفين
قدام عنيك لما تعدي
على سور قلبي
و انا واقفه برقب جايتك
من صلاة الفجر
و بافتح كتاب الأمنيات
و صفحه .. صفحه باسمَّع
باحبك يا صبح
عشان بتطرح عليا ابتسامته
و احبك يا ليل ..
اكمنك غموضه و حيرته
و لون جلدة كتابه
|
ــــــــــــــــــــــــــــــــــــــــــــــــــــــــــــــــــــــــــــــــ
اللي مليان
احتمالات مبتتحققش
و أحيانا .. باحبك يا خوف
علشان مبتسمحليش
إني أبوح
و احبك يا ابويا
قد ما حابَّه .. أقول
زي البنات
و أوِّري عيوني إزاي بتضحك
ساعة ما تحس بطوله بينفرد
على ضهر الطريق
29/1/2005
ليست هناك تعليقات:
إرسال تعليق