يا ربنا .. يا رب
شايف هموم الروح
و نوايا أفعالنا
ساكن هبوب الريح
وقتن تبعترنا
و ف قُرص نور الشمس
لمسة حنان منك
بتقول نعيش ..
فنعيش
يارب ما أجملك
أنا قد إيه باعشقك
نفسي ألمس ضياك
إن شاالله أموت بعدها
|
ــــــــــــــــــــــــــــــــــــــــــــــــــــــــــــــــــــــــــــــــ
ده خيالي فى القُدرة
و ف تكوينات كونك
عدا الغيوم .. و سرح
ف آياتك اتبعتر
و اتلم واتعثر
اتشال على موجَه
غرقانه فى المقدور
بتسبَّحك يارب
ساعة السكون
و ساعتن تفور
يا ربنا .. قلبي
هيدوِّبه عشقي
نفسي أغيب فى الوصل
|
ــــــــــــــــــــــــــــــــــــــــــــــــــــــــــــــــــــــــــــــــ
أتلاشي شكل و لون
أعود لبطن الأرض
أسبَّحك على طول
يا ساكن الروح
قلبي سكن نورك
لو تقبله .. هيعيش
عابد ف ضل صفاك
يحلم بلحظة عفو
يغمر قلوب الكون
و تعود بدايتنا
مخفيه سوءاتنا
نقطف من الجنه
نسمع كلامك .. قوي
|
ــــــــــــــــــــــــــــــــــــــــــــــــــــــــــــــــــــــــــــــــ
لا ناكل التفاح
و لا نستمع للغوي
علشان يجرجرنا
بره حماك
يا رب
السويس 23/9/2005
ليست هناك تعليقات:
إرسال تعليق