صمتَك بيقتلني
و بيبعترني تحت
رجليك فتافيت
و اللي اتكوي بالعشق
زيِّ للوطن .. قلبُه خفيف
ساعة ما يعلن حُبُه
يمسك كل الضل ف إيده
لأجل الشمس ما تحضن
كل تراب الأرض
دهشة عيونَك
بتشُقني نُصين
و اللي اتكَوي بالحُزن
زيِّ ع الوطن
|
ــــــــــــــــــــــــــــــــــــــــــــــــــــــــــــــــــــــــــــــــ
يلف عُمره على كتفه
شال ترحيلَه
و يصاحب هَمُه و دمَعُه
و خطوة رجليه
و يحس بدقة قلب الأرض
و بطبل ف قلبُه يسد
مسام ... العُمر
* * *
كل ما بتفرَّج
ع الصور المسنوده
على حيطة الألبوم
بموووت م الحب
و بولَّع قلبي طاقة فُرن
|
ــــــــــــــــــــــــــــــــــــــــــــــــــــــــــــــــــــــــــــــــ
يمكن يسيح الصوان
اللي اتربع فيه
يوم ما اتخرس صوتك
أنا بردُه سِكتّ
أتقنت دور فاقد الذاكره
بس ما أتعلق جسمي
ف بوز مسمار
مهوش من صُلب البيت
اتشق عمري
صرخِت سنين العشق
و غربلتني قصايد الحرمان
حبيت أبوح بالبُكا
حلِفتني دمعَه ف عيونَك
|
ــــــــــــــــــــــــــــــــــــــــــــــــــــــــــــــــــــــــــــــــ
ماحفزهاش للحزن
و لا انهش ف استسلامها
و لا اعلن للعالم هوان الحلم
المتصوَّر على حيطة أيامها
شيلت غرامي ف قلبي
و اكتفيت بأغنيه قديمه
بتشِد روحي
بحبال الوطن
السويس 17/3/2004
ليست هناك تعليقات:
إرسال تعليق