الريح بتبعتر غناوي الناي
و بتضحك زي ليلة برق قاسيه
بتدَّوِّب الانتظار
فى برَّاد الشاى
كانت عنيك مزروعه
فى آخر خطوه
مدِّيت بعدها وركبت عمري
و بعدت ..
عندك بيدْبَح ف تفاصيل
صورة زفاف
كان مفترض انه جاى
متزعلش ؟
قطعت صورتك حتتين
|
ــــــــــــــــــــــــــــــــــــــــــــــــــــــــــــــــــــــــــــــــ
حته قعدت فيها لوحدي
حاولت لآخر مَرَّه
أتملَّى فيك
و رغم حلمي المستخبي
فى نور عنيك
فرقتهم على اربع نواصي
بيطلُّوا على مشربية بيتنا
عشان كل ما ارمي نظري عليهم
أكرهك
ليست هناك تعليقات:
إرسال تعليق