با اتبرَّى م الزمن
اللي فات
بالم كل مشاعري و اجري
زمن الاباحه فى السكات
و نبوت الغفير
و كُحة ابويا تنطق ف سري
ساعة ما اوشوش نفسي
باللي شاغلني
شعري .. ماشي دوغري
خايف يطير ..
لعيون أبويا تدبحه
جرس الطابور
فجأة نترني م السرير
|
ــــــــــــــــــــــــــــــــــــــــــــــــــــــــــــــــــــــــــــــــ
وصلَبني على كل سور
عديت عليه
علامة استفهام
ما بين عيوني
و الطريق
كل ما احاول ..
طرف الإجابة
يكش .. و بيخاف من بصة
زراير بدلة العسكري
اللي واقف على
ناصية عقلي
باكلِّم روحي و أتجنن
و اسهر معاك يا قمر
|
ــــــــــــــــــــــــــــــــــــــــــــــــــــــــــــــــــــــــــــــــ
حاطط عينه .. عليَّه
و مكلِّم امي
ما تتنقل من ريحي
باعلِّى صوتي عشان يطولك
و يوشوشك
إستنا لما ضحكة امي تبان
و هي بتقلِّب شبابها
فى كباية الشاى
وتقدمه لابويا
فى صينية العشا
دلوقتي ها تكلم براحتي
ليه لأه م المبتدي
عامله حصار على عمري
|
ــــــــــــــــــــــــــــــــــــــــــــــــــــــــــــــــــــــــــــــــ
الحب لأ .. الرفض لأ
الاعتراض على الظلم فُجر
الاحتماء بالطهر جُبن
النومه ف حضن البراح
وقت اما العيون
العاشقه تفاصيل البوح
تِكِنْ .. لأه
يا قمر .. إنت المُذكر
الوحيد اللي باطرح
عقلي عليه
و باعرِّي افكاري
و ابعتر دموع خوفي
و رفضي
|
ــــــــــــــــــــــــــــــــــــــــــــــــــــــــــــــــــــــــــــــــ
و با اقبل اني اصعب عليك
و بارمي كل الورق فى وشك
و المه على نورك و اقولك
من غير ما اخاف
باحبك
ليست هناك تعليقات:
إرسال تعليق