بحرين دفا
شطين سلام
ننين عيون
واحة أماني مفرَّعه
و صِفصافه
و انا .. تحت منها باختفي
عن عين زماني
و اتوه ف دوامة خَضَارها
المرمري
و اترَد تاني
دايبه شريطتي فِ الضفيره
و حتة السكر تحلِّي الحلم
بالونة أحلامنا كبيره
|
ــــــــــــــــــــــــــــــــــــــــــــــــــــــــــــــــــــــــــــــــ
تِمُط سنيننا .. تتكور
يفرقع حِلم ميهمش
كتير غيره .. بيتبخر
نعود نترد فوق الشط
غناوي .. بحر من دمعه ..
وتنهيده ..
ودايره تِلِف تبلعنا
و طياره ورق تِعلَي
تِوَصَّل صوتنا فوق للكون
نشد فى حبل ثوانيها
و اتاريها
قابضه بجد
على سنينا
ليست هناك تعليقات:
إرسال تعليق