مناطق للحزن
مناطق للحزن
الواد ابو كرافته ..
خانقه الدنيا ف طرف عنيه
وعنيه مدسوسه ف كعب سنيني
سنيني تعبت م التفكير
لساه بيقلِّب نظريات الكون
و يوزع دخانه
على وشوش البنات
اللي بتفرح .. بلمسة قرب
القرب جناح بيطويني و بيرفع جسمي
الثقيل من حمولة السكه اللي ..
فوق بعضيها
و بيسألني.. حابة تشوفي نفس
الدنيا ؟
الدنيا المكتوبه ف حبر القصيده
|
القصيده اللي بكيت من ضعف الكلام
و حِمل الحروف المايله
من طول الانتظار
و الانتظار بيشُق ريق الحلق
و يطلع تنهيده مُره
مُره كوباية الغرام الساقع
لما تتشرب فى طوبه
طوبه من بيت الحلم وقعت
جرت وراها خيط الأماني
الأماني اللي اترسمت
على صفحة ندي ...
ف أول ريح خدت بعضها
و سلمت ع الحزن
|
و خدته بالحضن
الحضن فاضي .. و الندي
بطل يقف على وردة قلبي
السويس يونيه 2005
|
ليست هناك تعليقات:
إرسال تعليق