عقد الكلام
اما انفرط عقد الكلام
على شفايف الوقت .. مات
اتجمد رصيف المينا
ساعة ما سندت عمري عليه
ياه .. ما صدقت سنيني تبوح
ايه لسه فيكي مخنوق يا روح
ايه لسه ما اتقالش ؟
الجراب فجأه ما استحملش
طارت كل الحكاوي لفوق
اتشعلقت ف حرف السما
و فرجتني على عمري
مالك يا روح ..؟
متمدده ف حضن البكا
|
بتلفي سراديب الحياه
فكيتي عُقد الصمت ليه ؟
مبهوره من سرب الحروف
و نُقط الندي اللي بلِّت فكرتك
فدوبتي فيه
قادرة ف براحك تحتويه ؟
مالك ياروح .. عصيانه ليه ؟
عاشقة جناحات الطير
ضمة قلب السحاب
نفسك تشوفي الكون
مكشوف .. بلا أبواب
بتطلقي دهشتك
من ضلمة السرداب
|
طب حابّه ليه دمعتك ؟
وقت اكتشاف الحقيقة
و دايبه ليه في سندتك
للعمر يم البحر ؟
راح تطرحي روحك
وتعودي كلك سحر
تتخلصي م البوح
و للا تلمي الصمت
أو تعقدي صوتك
حبات حروف
متشكلوش لسه
على شفايف الوقت
السويس يوليه 2005
|
ليست هناك تعليقات:
إرسال تعليق