البناويت
{ 1 }
محتاجه تكون إنسان
يرسم على وش اليوم
حركة فعل .. من غير
ترديد آيات الهمس
و الاختباء تحت
تاء الاحتواء
و التسيس
{ 2 }
رافضه النهارده
تشد الضفاير
و ترميها على سطح البلوزه
عايزه ترفع صوتها
تطلب براءة اختراع
|
حق الانوثه .. واللذاذه
رغم صوتها اللي محبوس
فى عنق الإزازه
و محاوطها ضل نونو
كل ما تورب يعفر
فوق طموحها
تترمي جنب دولاب الخزين
تتعجن .. قرص
فى ماجور الطحين
تشاور للبت النونو
بإدين متشمرين
حاولي تكوني
يمكن فى يوم ألقاني
|
فى عنيكي
باانطق و باخرج
بره شرخ الطين
{ 3 }
ازاي تسمحي للشبابيك
انها تتستر على دخول الهواء
لقلبك المأسور
ممنوع عليكي
استضافة بصيص النور
حابه تعلني مثلا .. وجودك
فليكن .. لكن
بصوت مستور
|
{ 4 }
البناويت
حابين يغزلوا
فى شيلان الحريه
و يوزعوها هدايا
فى يوم المرأة العالمي
و يجمعوا صوتهم
فى بير غويط
و يقفلوه .. ليدلدق و يغرَّق الدنيا
تجري كل العصيان
و الصقور اللي نامت
ع الشنبات
و بصة عين الأمهات
|
اللي بتنفذ قهرا
بنود الإستعباد
علشان ما تحوز بالرضا
و بركة النفحات
لجل البناويت متبات
مقصوفة الأصوات
و تفتح بوابات
دنيا الشوار
لرميهن فى
عداد .. العروسات
السويس 5/5/2005
|
ليست هناك تعليقات:
إرسال تعليق